युनुसयात गोली कयेकूम्ह सिंह भारतया कुख्यात अपराधी
छानबिन यायेत समिति गठन
भारतीय नक्कली ध्यबाया कारोबारय् संलग्न जूगु अभियोगय् केन्द्रीय कारागारय् कुनातम्ह नेशनल टेलिभिजनया सञ्चालक युनुस अन्सारीयात कारागार दुने हे गोली कयेकूम्ह कुख्यात भारतीय अपराधी जूगु सीदुगु दु ।
घटना लिपा प्रहरीं बिहीवाः न्हिनय् छगू पत्रकार सम्मेलन यानाः युनुसयात गोली कयेकुम्हेसिया नां जसजित सिंह जूगु व उम्ह मनू भारतीय कुख्यात अपराधी जूगु धाःगु दु । सिंहं थ्वस्वां न्ह्यः भारतय् प्यम्हेसिया हत्या यायेधुंकूगु दु । थौं नं सिंहं युनुसयात स्यायेगु ताःतया गोलीं कयेकूगु खः ।
सिंह निम्ह ग्वाहलिमि नापं केन्द्रीय कारागारय् कुनातःम्ह कैदी चाल्स सोभरायात नापलायेगु धकाः दुहांवःगु जानकारी प्रहरी आयुक्त एआईजी अर्जुनसिंह शाहीं बियादिल । सिंह नापं वःपिं मेपिं निम्ह भारतीय नागरिकत सुरेश द्विवेदी व राहुल द्विवेदी अनं हे बिस्यूंवंगु व इमिगु सुराकी बीपिंत न्यय्द्वः तकाः सिरपा बीगु घोषणा प्रहरीं याःगु दु ।
छानबिन यायेत समिति गठन
थ्वहे दथुइ नेशनल टेलिभिजनया सञ्चालक युनुस अन्सारीयात केन्द्रीय कारागारय् गोलीं कयेकूगु विषय छानबिन यायेत छगू छानबिन समिति निस्वंगु दु । प्रहरी एआईजी रविन्द्रप्रताप शाहया संयोजकत्वय् उच्चस्तरीय छानबिन समिति निस्वंगु खः । उगु छानबिन समितिलय् सशस्त्रया डीआईजी परशुराम खत्री व एसएसपी माधव जोशी दुजः कथं दी ।
अथेहे उगु गोली काण्ड जूगु इलय् कारागारय् सुरक्षा जाँचय् खटेजूपिं प्रहरीया लापरवाही खनेदुगु धासें ड्युटीलय् दुपिं निम्ह प्रहरीयात निलम्बन याःगु दु । निलम्बनय् लाःपिं निम्ह प्रहरीया नां धाःसा खुले याःगु मदुनी ।
