झलनाथयात स्थायी समितिं न्ह्यसः तइगु
येँ (सन्ध्या टाइम्स)/प्रधानमन्त्री झलनाथ खनालं गृहमन्त्रीया लागिं पार्टीं खटे याःम्ह भाजु बिष्णु पौडेलयात गृह मबिसे रक्षामन्त्री दयेकूगु खँयात एमालें छलफलया विषय दयेकीगु जूगु दु।एमालेया महासचिव ईश्वर पोखरेलं थ्व खँ धयादीगु खः। बिष्णु पौडेलयात गृहमन्त्री दयेकेगु धकाः पार्टीं निर्णय यानातःगु दयेक दयेकं वय्कलं छाय् रक्षामन्त्री दयेकूगु खः, मेगु सहयात्री पार्टीयात छु खँय् मछिन धकाः थःगु पार्टीया निर्णय हिलेमाःगु खः धासें अध्यक्ष खनालयाके लिसः फ्वनीगु खँ नं महासचिव पोखरेलं कनादिल। पार्टी स्थायी कमिटीया वरिष्ठ दुजःपिं माधव नेपाल व खड्ग ओलीपिं राजधानी थ्यनेवं हे स्थायी समितिया बैठक च्वनाः थुकिया बारे खँ ल्हायेगु जानकारी नं वय्कलं बियादिल ।
थ्वहे झ्वलय् गृहमन्त्री प्रस्तावित जुयाः नं रक्षामन्त्री जुयादीम्ह भाजु बिष्णु पौडेलं मन्त्री जूगुयां लछि लिपा म्हिगः बल्ल मन्त्रालयय् ज्या याः वन। अन संक्षिप्त रुपं नुगःखँ प्वंकुसें वय्कलं माओवादीलिसे सरकारं याःगु वृहत् शान्ति सम्झौतापाखें नेपाली सेनायात छु छु समस्या वःगु खः उकियात चीकेगु ज्या थम्हं यायेगु बचं बियादिल। वय्कलं आन्दोलनय् रक्तपात मजूगु हे सेनाया संयमतां यानाः खः धकाः नेपाली सेनाया तारिफ नं यानादिल ।
