अन्ततः संविधानसभाया म्याद थपे यायेगु तयारी

येँ (सन्ध्या टाइम्स)/पिने सार्वजनिक रुपं न्ववाइबलय् इलय् हे संविधान जारी याये धकाः नेतातय्सं न्ह्याक्व हे जोश पिकयाः न्ववाःसां दुने दुने धाःसा संविधानसभाया म्याद थपे यायेगु तयारी नं शुरु याना हःगु दु। उकुन्हु तिनि संवैधानिक समितिया सभापति निलाम्बर आचार्यं जेठ १४ गते संविधानया मस्यौदा तकं तयार जुइ मखु धकाः न्ववानादीगु खःसा आः वय्कःया उगु धापूया खण्डन यासें माओवादी अध्यक्ष प्रचण्डं 'जेठ १४ गते मस्यौदा ला तयार जुइ' धइगु बिचाः न्ह्यःने तये हःगु दु। संविधानया विवादास्पद विषयत दुमथ्याकुसे जूसां अज्याःगु मस्यौदा तयार यानाः पिने यंकेगु वय्कःया ग्वसाः दुगु खँ सूत्रं धाःगु दु। अज्याःगु संविधान पिने यंकेबलय् जनतां स्वीकार याःसा उकियात लागू हे याना छ्वयेगु व विरोध याःसा सुझाव नं तयाः परिमार्जन यायेगु धकाः म्याद थपे यायेगु बिचाः तयाच्वंगु खँ नं धाःगु दु ।