जेल दुने हे गोलीं कयेकल
येँ (सन्ध्या टाइम्स)/नक्कली भारतीय ध्यबाया कारोबारय् संलग्न जूगु द्वपनय् थनया केन्द्रीय कारागारय् कुनातःम्ह यूनुस अन्सारीयात थौं जेल दुने गोलीं कयेकूगु दु। थौंकन्हय् संचालन जुयाच्वंगु नेशनल टेलिभिजनया संचालक अन्सारीयात नक्कली भारतीय कारोबारय् संलग्न जूगु धासें जेलय् कुनातःगु खः ।
कैदीयात नाप लाःवःपिंसं जेलया चेनगेट दुने च्वंच्वंम्ह अन्सारीयात गोलीं कयेकूगु प्रहरीं जानकारी बिउगु दु। छखे सुरक्षाया दृष्टिकोणं अतिकं महत्वपूणं गृह मन्त्रालय नेतृत्वविहीन जुयाच्वंगु अवस्थाय् तसकं कडा सुरक्षा दुगु जेल दुने हे छम्ह कैदीयात थुकथं गोलीं कयेकेवं थनया सुरक्षा व्यवस्था तसकं छ्वासुगु महसुस मनूतय्सं याःगु दु ।
जेल दुने कैदी नाप लायेत वःपिं स्वम्ह भारतीय नागरिकतय्सं अन्सारीयात गोलीं कयेकूगु खःसा गोलीं कयेकूपिं मध्ये अहमद खान नांयाम्ह मनूयात प्रहरीं ज्वंगु दु। अन्सारीयात धाःसा जन्हुफातय् गोलीं लाःगु दुसा आः वयात नर्भिक अस्पतालय् वासः याकातःगु दु।
जेल दुनेया कैदीयात नाप लायेत चुरोट, सलाइ, मोबाइल लगायतया ज्वलंत नं ज्वना वनेगुलिइ प्रतिबन्ध तयातःगु दुसा कैदीया न्ह्यःने हे वनाः गोलीं कयेकूगु घटनायात शंकास्पद रुपं काःगु दु ।
