फागुन मसान्त तक औद्योगिक हड्ताल स्थगित
स्वंगू प्रमुख दल आबद्ध मजदुर संगठनतय्सं तलब अप्वयेके माःगु माग यानाः याःगु आन्दोलन फागुन मसान्त तकया निंतिं स्थगित याःगु दु ।
नेपाल उद्योग वाणिज्य महासंघ व स्वंगू मजदुर संगठनत नेपाल ट्रेड युनियन कांग्रेस स्वतन्त्र, नेपाल ट्रेड युनियन महासंघ जिफन्ट व अखिल नेपाल ट्रेड युनियन महासंघ दथुइ बिहीवाः जूगु वार्ता लिपा फुक्कं पक्षं मंकाः रुपं विज्ञप्ति पिथना आन्दोलनया ज्याझ्वः लितकाःगु खः ।
उद्योग वाणिज्य महासंघं उद्योगय् हड्ताल जारी जूसाः थःपिनिगु उद्योगया ताःचा सरकारयात लःल्हायेगु धकाः पिथंगु ज्याझ्वः नं उगु हे विज्ञप्ति मार्फत फागुन मसान्त तकया निंतिं स्थगित याःगु दु ।
विज्ञप्तिइ निगूलिं पक्ष वार्ताया माध्यपाखें समस्या समाधन यायेत जिम्मेवारी पूर्वक लगे जुयाच्वंगु धासें फुक्कं कथंया संघर्षया ज्याझ्वः थनिंनिसें स्थगित याःगु खँ न्ह्यथनातःगु दु ।
