युनुसयात जेल दुने हे गोली प्रहार, गोलीं कयेकूम्हेसित ज्वन
नक्कली भारतीय ध्यबाया कारोबारय् संलग्न दुगु अभियोगय् कुनातःम्ह नेश्नल टेलिभिजनया सञ्चालक युनुस अन्सारीयात बिहीवाः सुन्धारा स्थित केन्द्रीय कारागारय् हे गोलीं कयेकूगु दु ।
युनुसयात नापलायेत धकाः सुथय् ११:३० बजे जेल दुने दुहांवंम्ह भारतीय नागरिक अहमद खानं चेन गेट दुने दुम्ह युनुसयात गोलीं कयेकूगु खः । युनुसयात स्यायेगु ताः तयाः गोलीं क्येकूगु खःसां युनुसया सावधानीया कारणं वयाः जँय् गोलीं लाःगु खः ।
गोलीं ला:म्ह युनुसयात थापाथली स्थित नर्भिक अस्पतालय् वासः याकातःगु दुसाः वयाः अवस्था खतरामुक्त जूगु खँ धाःगु दु ।
कैदी नापलायेत वइपिंत तक्वः हे जाँच याइगु जेल दुने तकं गोलीं कयेकूगुलिं उगु घटनाय् प्रहरीया हे मिलेमत्तोय् दुगु अनुमान याःगु दु । गोलीं कयेकूम्ह भारतीय नागरिक खानयात गोलीं क्येकेवं प्रहरीं ल्वाभः सहित अन हे ज्वंगु खः ।
खानं थःत झिंन्यागू लख बियाः युनुसयात स्यायेत छ्वःगु बयान प्रहरीयात ब्यूगु दु । घटनाया बारे थप अनुसन्धान जुयाच्वंग खँ प्रहरीं धाःगु दु ।
