संविधान सुनिश्चित मजूत्तले सेना समायोजन जुइमखु : किरण
एकीकृत नेकपा (माओवादी)या वरिष्ठ न्वकु मोहन वैद्य 'किरणं' संविधान च्वयेगु ज्या सुनिश्चित मजूत्तले जनसेनाया समायोजन मजुइगु खँ धयादीगु दु ।
सेना समायोजन यायेधुंकाः जक न्हूगु संविधान पिथनेगु गुलिखय् दलतय्गु बिचाः वयाच्वंगु इलय् किरणं थज्याःगु धापू पिने वःगु खः । अखिल क्रान्तिकारीया निवर्तमान नायः लेखनाथ न्यौपानेपाखें च्वयादीगु स्वंगू सफूया थौं येँय् सार्वजनिक यानादिसें वय्कलं सेना समायोजनया विषय शान्ति प्रक्रियालिसे स्वानाच्वंगुलिं संविधानलिसे हे क्वःछीमाःगुलिइ ब: बियादिल ।
यथास्थितिपाखें हे संविधान दयेकेगु अवस्था पिहांवःसा जनविद्रोहलय् वनेगु ख्याच्वः नापं वय्कलं बियादिल । २००७ सालनिसें ३६ व ४६ साल जुयाः ६२/६३ या जनआन्दोलनतक्क नं थःपिंसं सम्झौता जक यानाःगु धयादिसें वय्कलं आः जनविद्रोहलय् वनेगु धयादिल ।
ज्याझ्वलय् न्वकु किरणं न्यौपानेपाखें च्वयादीगु 'विद्यार्थी आन्दोलनमा २२ वर्ष', 'शिक्षामा पुनर्संचनाको बहस' व 'प्रतिनिधित्व कलम' नांया स्वंगू सफू सार्वजनिक यानादीगु खः ।
