कन्हय् विशेष समितिया बैठक
सेना समायोजन व पुनःस्थापनाया विषयलय् सहलह यायेत कन्हय् सेना समायोजन विशेष समितिया बैठक च्वनिगु जूगु दु । बैठकय् जनसेनायात व्यवहारिकरुपय् विशेष समिति मातहत हयेगु प्रक्रियाबारे सहलह जुइ ।
संवैधानिक समिति अन्तर्गतया उपसमितिया थौंया बैठकय् राज्य पुनःसंरचना व शान्तिप्रक्रिया लिसलिसे क्वःमछ्यूतले संविधान निर्माण सम्भव मजुइगु काङ्ग्रेसं अडान तयेवं प्रधानमन्त्री व माओवादी नायः विशेष समिति बैठक इनाप यायेत सहमत जूगु काङ्ग्रेस संसदीय दलया नेता रामचन्द्र पौडेलं जानकारी बियादिल । काङ्ग्रेसं बैठकय् चैत मसान्त दुने जनसेनायात व्यवहारिक रुपय् विशेष समिति मातहत हयेगु खँ ल्ह्वनेगु तयारी याःगु दु ।
वंगु माघ ८ गते चितवनया शक्तिखोरय् विशेष समारोह ग्वसाः ग्वयाः जनसेना विशेष समिति मातहत वनेधुंकूगु घोषणा याःसां नं गुलिखय् दलं जनसेनायात माओवादीया चेनअफ कमाण्डपाखें नं मुक्त यायेमाःगु माग तयाः वयाच्वंगु दु ।
जनसेना व्यवहारिक रुपय् हे विशेष समिति मातहत वःसा गृह मन्त्रालय माओवादीयात बिइत प्रधानमन्त्री झलनाथ खनाल सहमत जूगुलिं नं विशेष समिति बैठकयात महत्वया लिसे स्वःगु दु । विशेष समितिया नायः प्रधानमन्त्री जुइगु प्रावधान दु ।
