'शान्ति व संविधानया निंतिं सरकार दृढ'

प्रधानमन्त्री झलनाथ खनालं शान्ति व संविधानया निंतिं सरकार दृढता लिसे न्ह्यानाच्वंगु धयादीगु दु । सच्छि व छक्वःगु अन्तर्राष्ट्रिय मिसा दिवसया लसताय् राष्ट्रिय महिला आयोगं थौं येँय् ग्वसाः ग्वःगु ज्याझ्वलय् प्रधानमन्त्री खनालं उगु खँ धयादीगु खः । संविधान च्वयेगु व शान्ति प्रक्रिया निष्कर्षय् मथ्यंतले देशं निकास कायेमफइगु प्रधानमन्त्री खनालया धापू दु । वय्कलं सरकारं याकनं हे पूर्णता दइगु नं धयादिल ।

न्हूगु संविधानय् महिला आयोगयात अधिकार सम्पन्न दयेकेगु प्रतिवद्धता नं वय्कलं प्वंकादिल । नागरिकताय् मिसाया अधिकार लाकाः काइकथं छु नं निर्णय मयाइगु वय्कलं धयादिल ।

ज्याझ्वलय् राष्ट्रसंघीय आवासीय प्रतिनिधि रोबर्ट पाइपरं नागरिकताय् मिसाया अधिकार सुनिश्चित जूसा जक फुक्क अधिकार दइगु बिचा: प्वंकादिल ।