सेनायात बाधा जूगु समस्या खुल्ला याये: रक्षामन्त्री
येँ (सन्ध्या टाइम्स)/सरकारय् न्हू नियुक्त जुयादीम्ह रक्षामन्त्री विष्णु पौडेलं वृहत् शान्ति सम्झौतया कारणं नेपाली सेनायात समस्या जुयाच्वंगु बाधात खुल्ला याना यंकेगु खँ धयादीगु दु। ४७ प्रतिशतं मल्याक नेपाली सेना अझं बङ्करय् कष्टपूर्ण जीवन यापन यायेत बाध्य जुयाच्वंगु थःत सुचं वःगु धासें अनं मुक्त यायेगुपाखें पहल यायेगु नं मन्त्री पौडेलं धयादीगु दु ।
पदीय दायित्व वंगु छुं दिं न्ह्यः हे बी धुंकूगु खःसा थौं तिनि पदभार ग्रहण यासें वय्कलं थुगु खँ धयादीगु खः। पदभार ग्रहणया झ्वलय् थःगु प्रतिक्रिया बियादिसें रक्षामन्त्री पौडेलं नेपाली सेनां राष्ट्रिय अखण्डता व सार्वभौमसत्ताया रक्षाया निंतिं याना वयाच्वंगु ज्यायात च्वछायादिल ।
नेपाली सेनां राजनीति याये मजिउ धासें मन्त्री पौडेलं नेपाली सेनायात ईयात ल्वय्क लोकतान्त्रिक व व्यवसायीकरण याना यंकेगु नं धयादीगु दु। अन्तरिम संविधान व शान्ति सम्झौता कथं माओवादीया लडाकुतय् समायोजन याना यंकेगु नं मन्त्री पौडेलं धयादीगु दु ।
