मनपाया थःगु हे नक्सा वडां पना बिल
येँ (सन्ध्या टाइम्स)/येँ महानगरपालिका धइगु येँ देशय् गुलि नं व्यक्ति वा संस्थां छेँ दनी, वयागु नक्सा पास वा फेल याइगु निकाय खः। तर येँ मनपा थम्हं हे दनेत्यंगु गुगुं छेँया नक्सा मेगु निकायं फेल याना बिल धाःसा अबलय् छु यायेगु?
थौंकन्हय् छगू केश अथे हे जुयाच्वंगु दु। येँया पुलां भन्सालय् च्वंगु मनपाया पुलांगु भवन दुगु खालीगु जग्गाय् आः मनपा थम्हं हे बिजिनेस कम्प्लेक्स दयेकेगु धकाः तयार यानातःगु छगू नक्सा उगु जग्गा लानाच्वंगु येँया हे २२ वडा कार्यालयं पना बिउगु दु ।
मनपां उगु जग्गाय् बिजिनेस कम्प्लेक्स दयेकेगु धकाः प्रस्ताव याःगु खःसां स्थानीय जनतां धाःसा २२ वडा लागाय् यक्व हे बिजिनेश कम्प्लेक्स दयेकधुंकल, उकिं आः थप कम्प्लेक्स मदयेकूसां जिउ, बरु उकिया पलेसा नगरवासीयात सुविधा जुइ कथं अन पार्किङ्ग भवन दयेकेमाल धकाः माग यानाच्वंगु दु। उगु लागाया थीथी व्यापारिक पुचः, क्लब व राजनीतिक पार्टीया प्रतिनिधितय्सं समेत अन व्यापारिक भवन सिबें पार्किङ्ग भवन हे दयेकेमाः धकाः माग यानाच्वंगु दुसा मनपा व्यापारिक भवन हे दयेकेगु अडान कयाच्वंगु दु। थ्वहे झ्वलय् स्थानीय जनताया दवावं यानाः वडा कार्यालयं मनपाया नक्सा समेत पास मयासे अन हे थाका तःगु खः। मनपा धइगु जनताया सेवा याइगु निकाय जूगुलिं थ्व फाइदा-घाटा सिबें नं नगरवासीया सुविधायात न्हापांगु प्राथमिकता बीमाः धइगु स्थानीय जनताया माग जुयाच्वंगु दु ।
