संविधानया स्वीगू बुँदाय् सहमति, ४५ गू जक ल्यं दनि

येँ (सन्ध्या टाइम्स)/न्हूगु संविधान च्वयेगु झ्वलय् पिहां वयाच्वंगु विवादित विषय ज्यंकेत थौं च्वंगु संवैधानिक समिति अन्तर्गतया उपसमितिं विवादित थीथी न्हय्न्यागू मध्ये स्वीगू बुँदाय् सहमति कायम याःगु दु। थ्व स्वीगू बुँदाय् नं दलतय् दथुइ सहमति कायम जुइवं आः देय्या न्हूगु संविधान जारी यायेत मिले मजुयाच्वंगु पीन्यागू बुँदा जक ल्यं दनि ।

उपसमितिया थौंया बैठकय् व्यवस्थापिका अंगया स्वरुप निर्धारण समितिया प्रतिवेदनय् सहलह जूगु खः। थ्व विषयस उपसमितिइ जूगु सहलहया झ्वलय् व्यवस्थापिका संसदया प्रतिनिधि सभा भंग जुयाः खुलाया दुने नं निर्वाचन मजुल धाःसा उकियात हाकनं पुनःर्स्थापना मयायेगु व अज्याःगु संक्रमणकाली अवस्थाय् राष्ट्रिय सभां ज्या कायेगु विषयय् प्रारम्भिक सहलह जूगु बैठक ब्वति कयादीम्ह छम्ह नेतां जानकारी बियादीगु दु ।

अथे हे संघीय व्यवस्थापिकाया सदस्यतय् उमेरया लिसें व्यवस्थापिकाया कार्य विभाजनया विषयय् नं सहमति जूगु दु। नापं प्रतिनिधि सभाया दुजःतय् ल्याः नं क्वपालेगु खँ जूसां गुलि संख्याया यायेगु धइगु विषयय् धाःसा छुं निर्णय याःगु मदुनि ।

समितिया विवादित विषयत मध्ये राज्य पुनःसंरचना समिति व निर्वाचन सम्बन्धी नं आपालं ल्वाःथें ज्याःगु विषयत नं चीकूगु जानकारी बिउगु दु ।

थ्व स्वयां न्ह्यः केन्द्रय् निगू जक व्यवस्थापिका सदन तयेगु खँय् सहमति जुइ धूंकूगु दु। संविधान च्वयेगु झ्वलय् पिहां वःगु विवादत ज्यंकेगु निंतिं गठन यानातःगु थुगु उपसमितियात फागुन मसान्ततकया ई बियातःगु दु ।