जरिमैयाँ सिरपाः लःल्हात
ख्वप (सन्ध्या टाइम्स)/मिसा दिवसया लसताय् लाकाः म्हिगः नेपालभाषाया छम्ह मिसा च्वमि व छम्ह मिजं च्वमियात छम्ह मिसाया हे नामं स्वनातःगु जरिमैयाँ साखः लुमंति सिरपाः लःल्हायेगु ज्या जुल। थनया अरनिको सभा भवनय् नेपाल साहित्य मन्दिरया ग्वसालय् जूगु छगू ज्याझ्वःया दथुइ मिसा बाखं च्वमि लोचनतारा तुलाधर व ल्याय्म्ह च्वमि विमल ताम्राकारयात उगु सिरपाः लःल्हायेगु ज्या जूगु खः ।
साहित्य मन्दिरया नायः तिलकप्रकाश कायस्थया सभापतित्वय् जूगु उगु ज्याझ्वलय् मूपाहां प्रा. ऐश्वर्यलाल प्रधानांगं सिरपाः लःल्हानादीगु खः ।
सिरपाः लःल्हाना कासें बाखं च्वमि तुलाधरं मिसापिं साहित्यकारत इहिपा लिपा तना वनी धाःसां थम्हं धाःसा अझ नं च्वया च्वनागु दु धयादिल। मेम्ह विजयी विमल ताम्राकारं थःत वःगु सिरपाःया थ्व दां डा. तुयूबहादुर महर्जनया 'स्तरीय नेपालभाषाया रुपय् येँ यल' नांगु सफू पिकायेत फ्यायेगु जानकारी बियादिल ।
ल्यज्या पुचःया दुजः तेजेश्वरबाबु ग्वंगःजुं थःपिंसं व्यक्तिया ख्वाःपाः स्वयाः मखु कृतित्व स्वयाः सिरपाःया लागिं ल्ययागु खः धयादिल। भाषाथुवाः रमापतिराज शर्मां न्हूगु पुस्तायात सिरपाः बी दयाः थःपिं लय्तायागु दु धयादिल।
नेपालभाषाया मिसा च्वमिपिंत जक बीगु झिद्वः तकाया थुगु सिरपाः थुगुसी न्हापांखुसी नेपालभाषाया मिजं च्वमियात नं बीगु शुरु याःगु खः ।
