विवादित ३० बुँदाय् सहमित

विघटित संसद हानं पुनःस्थापना मजुइगु

न्हूगु संविधान निर्माणया झ्वलय् खनेदुगु ७५ विवादित बुँदा मध्ये ३० बुँदाय् सहमति जूगु दु । संवैधानिक समिति अन्तर्गतया उपसमितिया थौं च्वंगु मुँज्यां ३० बुँदाय् सहमति याःगु खः । थ्वस्वयां न्ह्यः हे उगु समितिं केन्द्रय् निगू सदानात्मक व्यवस्थापिका व प्रदेशय् छगू सदन तयेगु लगायत विषयलय् सहमति यायेधुंकूगु दु ।

थौंया मुँज्याय् व्यवस्थापकीय अंगया स्वरुप निर्धारण समितिया प्रतिवेदनय् सहलह याःगु खःसा उगु मुँज्यां प्रतिनिधिसभा विघटन जूगु खुला दुने नं निर्वाचन जुइमफुसाः प्रतिनिधिसभा हानं पुनःस्थापना मयासें अज्याःगु संक्रमणकालय् राष्ट्रियसभां ज्या याइगु सहमति याःगु दु ।

मुँज्यां प्रतिनिधिसभाया दुजःतय् ल्याः २४० स्वयां म्हो तयेगु सहमति याःसां यकिन ल्याखय् धाःसा सहमति यायेमफुत । अथेहे व्यवस्थापिकाया दुजःतय् दँ, व्यवस्थापिकाया कार्यविभाजन लगायत विषयलय् उपसमितिं सहमति याःगु दु ।

दलत दथुइ अझ नं निर्वाचन प्रणाली, राज्य पुनःसंरचना नापं न्याय प्रणाली लगायत ४५ विषयलय् सहमति जुइ ल्यँ दनी । कन्हय् च्वनीगु उपसमितिया मुँज्यां न्याय प्रणालीया विषयलय् सहलह याइगु ज्याझ्वः दु ।