थौं देय्न्यंकया निजी विद्यालय बन्द
नेपाल संस्थागत विद्यालय शिक्षक युनियन (इस्टुं) थीथी माग तयाः थौं देय्न्यंकया निजी विद्यालय बन्द याःगु दु । बन्दया हुनिं थौं फुक्कं निजी विद्यालय पूर्णरुपं बन्द जूगु दु ।
इस्टुं सरकारनाप जूगु वार्ताय् छुं उपलब्धी मजूगु धासें थौं छन्हु बन्दया घोषणा याःगु खः । इस्टुं शिक्षकतय्त नियुक्ति पत्र बीमाःगु, प्रचलित तलबभत्ता, सञ्चयकोष लगायतया सुविधा उपलब्ध याकेमाःगु माग याःगु दु ।
नापं इमिसं विद्यालयत कम्पनि ऐनय् दर्ता यायेगु प्रावधान खारेज यायेमाःगु, नेपाःया राष्ट्रियताय् हस्तक्षेप जुइगु कथंया सफू खारेज यायेमाःगु, बिना अनुमति सञ्चालनय् वयाच्वंगु विद्यालययात कानुनया दायराय् हयेमाःगु लगायतया माग याःगु दु ।
इस्टुं थःपिनिगु माग पूवंकेत दबाव बीगु कथं थौं छन्हु जक बन्द याःसां यदि निजी विद्यालय सम्बन्ध सरोकारवाला पक्षत संवेदनशील मजूसाः चरणबद्ध रुपं कडा आन्दोलन यायेगु ख्याच्वः ब्यूगु दु ।
