फोरम एमालेयात ह्ययेकेगुली व्यस्त
अवधारणाय् चित्त बुझ जूगु लिसः मवः: फोरम
येँ (सन्ध्या टाइम्स)/सरकारय् सहभागि जुइगु निंतिं मधेसी जनहधिकार फोरमया नेतात सरकारया नेतृत्व यानाच्वंगु एमालेया नेतातय् ह्ययेकेगु ज्याय लगे जुयाच्वंगु दु ।
सरकारय् वनेत फोरमं न्ह्यब्वःगु अवधारणाय् सरकारया नेतृत्व यानाच्वंगु एमालेया लिसलं थःपिं लुमधंगु फोरमं जानकारी बिउगु दु। सरकारय् वनेत फोरमं संविधान, शान्ति प्रक्रिया नापनापं मधेसया मुद्दायात नं कयाः थःपिनिगु अवधारणा न्ह्यःने हयाच्वंगु खः ।
थ्व झ्वलय् एमालेया लिसः चित्त बुझे मजुइवं प्रधानमन्त्री खनालया लिसें एमालेया सहयोगी नेतात नापं फोरमं गठन यानातःगु कार्यदल दथुइ थौं सनिलय् हाकनं सहलह जुइत्यंगु दु। थौंया सहलहय् नं थःपिंसं न्ह्यथनागु अवधारणायात कयाः सरकारं न्हापा बियातःगु लिसः चित्त बुझे मजूगु खँ तइगु जूगु दु ।
थ्व स्वयां न्ह्यः वंगु आइतवाः एमालेया नेतात नापं फोरमं सहलह याःगु खःसा उगु सहलहया झ्वलय् एमाले नेतातय्सं क्वःछिउगु इलय् संविधान जारी यायेगु, शान्ति प्रक्रियाया लिसें न्हापा जूगु थीथी बुँदाया सहमति कार्यान्वयन यायेगु प्रतिवद्धता प्वंकूगु खँ सीदुगु दु ।
सरकारपाखें चित्त बुझे जुइक लिसः मवःतले व पूर्ण रुपं प्रतिवद्धता मवःतले थःपिं सरकारय् मवनेगु फोरमं स्पष्ट याःगु दु ।
