मधेसी नेतातपाखें जनविद्रोहया खण्डन
येँ (सन्ध्या टाइम्स)/थीथी सरकारलिसे थःपिंसं याना तयागु सहमतित पूमवंकल धाःसा मधेसी मोर्चां नं जनविद्रोह याइ धकाः वयाच्वंगु चर्चायात मधेसवादी दलतय्सं खण्डन याःगु दु
।
सद्भावना पार्टीया राजेन्द्र महतों थःपिं लगायत मधेसी मोर्चां गनं नं अथे मधाःसां मिडियां उकियात म्वाः मदयेक हल्ला याना बिउगु खँ धयादीगु दु ।
यदि मधेसी जनताया माग पूरा मयात धाःसा आन्दोलन यायेगु जुइ धकाः ला थःपिंसं न्हापांनिसें हे धया वयाच्वनागु खः धासें वय्कलं आः जनविद्रोह धइगु खँ ला थःपिंसं गनं गबलें हे मधासां चर्चाय् वयाच्वंगु जानकारी नं वय्कलं बियादिल ।
यदि दवाव बियां नं राज्य पक्षं मन्यन धाःसा अन्तिम उपाय कथं जनविद्रोह नं थःपिंसं याये मालेफु धकाः धयाच्वनागु खःसां अज्याःगु जनविद्रोह आः थथें यायेगु धइगु खँ धाःसा थःपिंसं गनं मधयागु व अज्याःगु ग्वसाः नं थःपिंके मदुगु खँ वय्कलं कनादिल। छुं जुयाः माग पूरा याकेत थःपिंसं बियागु दवावयात वेवास्ता यात धाःसा अज्याःगु इलय् धाःसा न्ह्यागु नं जुइफुगु ख्याच्वः नं वय्कलं बियादिल ।
अथे हे मेपिं मधेसी नेतातय्सं नं माग पूरा मयाःगु खण्डय् जनआन्दोलन यायेगु धइगु जक थःपिनि धापू खः, जनविद्रोह धइगु ला 'टङ स्लिप' जुयाः नं धाःवंगु खयेफु धकाः नं न्हापाया धापूया खण्डन याःगु दु ।
सरकारय् माओवादी व एमालेया गठबन्धन तयार जुइवं भारत छपलाः लिउने लाः वंगु दु। उकिं वर्तमान सरकारयात असफल यायेगु लागिं भारत सक्रिय जुयाच्वंगु इलय् हे सरकारय् सहभागी मजूपिं मधेसी पार्टीतय्सं जनविद्रोह यायेगु धकाः खँ पित हःगुलिं सरकारय् सहभागी जूपिं मधेसवादी पार्टीत तम्वःगु खः। सरकार गठन लिपा मधेसी मोर्चा हानं अस्तव्यस्त जूगु दु ।
