रकारी घोषणां हलियातय् झन् बिजोग
येँ (सन्ध्या टाइम्स)/थःपिनि बुँइ ज्या याकेगु लागिं हलिया तयेगु प्रथा खारेज यानागु जुल धकाः सरकारं घोषणा जक यात तर उगु प्रथा खारेज जुइवं मुक्त जुया वःपिं हलियातय् लागिं छुं हे व्यवस्था मयाःगु कारणं सुदूरपश्चिमय् सलंसः मुक्त हलियातय् बिजोग जूगु दु ।
सरकारं आः सुनां नं हलिया तये मंत धकाः हलिया प्रथा खारेज याना बीवं उगु लागाया फुक्क धइथें जमिन्दारतय्सं थःथाय् तयातःपिं हलियातय्त लिकया हयेगु शुरु यात। तर लिकया हयेवं न्हापा च्वंच्वनागु थाय् नं मदुगु व लिपा वनेगु थाय् नं मदयाः उपिं छगू कथंया 'सामाजिक नाकाबन्दी' इ लाःगु खँ पीडित हलियातय्सं धाःगु दु ।
न्हापा हलिया च्वनीबलय् उमित जमिन्दारतय्सं च्वनेगु थाय् व नयेगु व्यवस्था तक याना तःगु खः। उकिया वापत उमिसं जमिन्दारतय् बुँइ ज्या याना बीमाः। थ्व छगू कथंया श्रम शोषण नं खः। सरकारी घोषणां यानाः उपिं थज्याःगु श्रम शोषणं मुक्त ला जुल तर मुक्त जुइधुंकाः वनेगु थाय् व यायेगु ज्या मदयाः तःधंगु बिचल्लीइ लानाच्वंगु दु ।
सामाजिक रुपं उपिं पूर्व हलिया जूगुलिं समाजं हेपे याइगु छखे दुसा मेखे आर्थिक विपन्नतां यानाः नयेत तकं समस्या जुयाच्वंगु दु। लः वंसा हितिइ तकं उमित वये मते धकाः ब्वः बिया हइगु अवस्था जुयाच्वंगु खँ नं धाःगु दु।
उमिगु अवस्था बारे अध्ययन यायेत उकुन्हु तिनि उखे वंगु संसदीय समितिया पुचः सरकारं हलियातय् बिजोग याना बिउगु खनाः चकित जूगु खः ।
