फागुन दुने सरकारयात पूर्णता बीगु सहमति
येँ (सन्ध्या टाइम्स)/प्रधानमन्त्री झलनाथ खनाल व एनेकपा माओवादी अध्यक्ष पुष्पकमल दाहाल 'प्रचण्ड' दथुइ थ्व हे फागुन मसान्त तकया दुने सरकारयात पूर्णता बीगु सहमति जूगु दु। खनाल नेतृत्वया सरकार गठन जूगु लछि तक नं विस्तार जुइ मफुगु खःसां छुं दिं न्ह्यः जक विस्तार यायेगु ज्या जूगु खः ।
प्रम खनाल व माओवादी अध्यक्ष प्रचण्ड दथुइ थौं सुथय् प्रधानमन्त्री निवास बालुवाटारय् जूगु सहलह लिपा सरकारयात पूर्णता बियाः शान्ति प्रक्रियायात याकनं स्वयाः याकनं निष्कर्षय् थ्यंकेगु सहमति जूगु खः।
माओवादी अध्यक्ष प्रचण्ड उपप्रधानमन्त्री नापं सूचना व संचार मन्त्री कृष्णबहादुर महरा नापं बालुवाटार झायादीगु खःसा उगु इलय् वय्कःपिनि दथुइ झण्डै बाघौ तक खँल्हाबल्हा जूगु खः ।
सहलहया हे झ्वलय् प्रम खनालं विष्णु पौडेलयात रक्षा व गंगालाल तुलाधरयात शिक्षा मन्त्रालयया जिम्मेवारी बीगु निर्णय स्थायी समितिया बैठकं याःगु नं जानकारी बियादीगु खः ।
