'जनताया न्हूगु संविधान मदयेकीगु अवस्था वःसा विद्रोह'
एकीकृत नेकपा (माओवादी)या छ्याञ्जे सी.पी गजुरेल 'गौरवं' जेठ १४ गते जनताया न्हूगु संविधान मदयेकीगु अवस्था वःसा विद्रोह यायेगु ख्याच्वः बियादीगु दु । संविधानसभापाखें संविधान पिहांमवइगु स्थिति जूसा जनताया न्हूगु संविधान बिद्रोहपाखें तयार यायेगु वय्कलं धयादिल ।
सच्छि व छक्वःगु अन्तर्राष्ट्रिय महिला श्रमिक दिवसया लसताय् अखिल नेपाल महिला संगठन, क्रान्तिकारी लगायतया जनवर्गीय संगठनपाखें थौं येँया शान्तिबाटिकाय् ग्वसाः ग्वःगु ज्याझ्वलय् छ्याञ्जे गौरवं जनताया संविधान छु नं हालतय् च्वयाः त्वःतेगु स्पष्ट यानादिल । क्रान्तिया उपलब्धीत लाकाः कायेगु षडयन्त्र जुयाच्वंगु धयादिसें वय्कलं क्रान्तियात सम्पन्न यायेगुपाखें माओवादी लिमचीलिगु धयादिल ।
वय्कलं एमालेया म्हिगःया स्थायी समिति बैठकं याःगु निर्णययात पार्टीं सकारात्मक रुपय् काःगु धयादिल । वय्कलं एमालें गृह त्वःताः रक्षा मन्त्रालयया बिषयलय् क्वःछ्यूगुलिं गृह मन्त्रालय माओवादीयात हे तयात:गु स्पष्ट जुइगु धयादिल ।
छ्याञ्जे गौरबं महिला मुक्तिया आन्दोलन धइगु हे समग्र देय्या मुक्ति आन्दोलन जूगु धयादिल । वय्कलं जनयुद्धय् मिसातय्गु भूमिका च्वछाये बहःगु न्ह्यथनादिसें नीन्यासः स्वयाः आपालं मिसा योद्धां हायेकूगु हिं सार्थकता कायेत पूमवंगु क्रान्तियात पूवंकेमाःगु धयादिल ।
