जेठ १४ दुने हे शान्तिप्रक्रिया पूवनि : शान्तिमन्त्री अनन्त

शान्ति लिसे पुनःनिर्माण मन्त्री वर्षमान पुन 'अनन्तं' जेठ १४ गते दुने हे शान्तिप्रक्रिया क्वःछीगु धयादीगु दु।

रिपोर्टर्स क्लबं थौं येँय् याःगु साक्षात्कारय् मन्त्री अनन्तं शान्तिप्रक्रिया पूवंकाः हे जेठ १४ गते न्हूगु संविधान पिहांवइगु दाबी यानादीगु खः । छन्हु निन्हुया दुने हे सेना समायोजन विशेष समितिया बैठक च्वनाः सेना समायोजन व पुनःस्थापनाया कार्यतालिका क्वःछीगु जानकारी नं वय्कलं बियादिल ।

बैठकं विशेष समिति अन्तर्गतया उपसमितियात जनशक्ति व श्रोत साधनया ब्यवस्था यायेगु जानकारी बियादिसें वय्कलं जनसेनाया ब्यागलं फोर्स दयेकेत दलत दथुइ सहमति जुइधुंकूसां नं उकिया बारे थप सहलह यानाः जक क्वःछीगु धयादिल । सेना समायोजनया ज्या याकनं क्वचाःसां नं पुनःस्थापनाया ज्या क्वःचायेकेत निदँनिसें न्यादँतक्क बिइगु वय्कलं धयादिल ।