सरकारयात याकनं हे पूर्णता बिइत प्रधानमन्त्री व प्रचण्ड सहमत
एकीकृत नेकपा (माओवादीं) गृह मन्त्रालयया विवाद याकनं क्वचायेकाः सरकारयात याकनं पूर्णता बिइत प्रधानमन्त्री झलनाथ खनालयात इनाप याःगु दु । मन्त्रीत विष्णु पौडेलयात रक्षा व गंगालाल तुलाधरयात शिक्षा मन्त्रालयया जिम्मेवारी बिइगु एमाले स्थायी समितिया निर्णय लसकुस यायेबहःगु धासें माओवादीं गृह मन्त्रालयया विवाद नं याकनं क्वचायेकेत इनाप याःगु खः ।
थौं बालुवाटारय् प्रधानमन्त्रीयात नापलानाः माओवादी नायः पुष्पकमल दाहाल 'प्रचण्डं' सरकारयात याकनं पूर्णता बियाः शान्ति प्रक्रियायात निष्कर्षय् थ्यंकेत इनाप याःगु खः । वय्कःपिं दथुइ फागुन महिना दुने हे सरकारयात पूर्णता बिइगु बारे गम्भीर सहलह जूगु बालुवाटार स्रोतं जानकारी ब्यूगु दु ।
प्रधानमन्त्री निर्वाचित जूगु लच्छि बिइधुंकाः नं सरकारं पूर्णता कायेमफयाच्वंगु अवस्थाय् माओवादी नायः प्रचण्ड व प्रधानमन्त्री खनाल दथुइ नापलाये ज्या जूगु खः । नापलाये ज्याय् सेना समायोजनया विषय नं याकनं क्वःछीत निम्हं नेता सहमत जूगु धाःगु दु । माओवादी नायः प्रचण्ड उपप्रधानमन्त्री नापं जुयाच्वंम्ह माओवादी विदेश विभाग प्रमुख कृष्णबहादुर महरालिसे बालुवाटार झायादीगु खः । वय्कःपिंदथुइ बाघौतक्क नापलाये ज्या जूगु खः ।
