पौडेलयात रक्षा, तुलाधरयात शिक्षा
प्रधानमन्त्री झलनाथ खनालं एमाले पाखें मन्त्री नियुक्त जूपिं विष्णु पौडेल व गंगालाल तुलाधरयात थःथःगु मन्त्रालयया विभाग ब्यूगु दु । एमाले स्थायी कमिटीया मुँज्या लिपा उगु हे मुँज्याया निर्णय कथं पौडेलयात रक्षा व तुलाधरयात शिक्षा मन्त्रालयया जिम्मावेरी ब्यूगु ख: ।
थ्वस्वयां न्हयः निम्ह मन्त्रीतय्त बिना विभागीय मन्त्रीया हैसियतं पद तथा गोपनियताया सपथ ग्रहण याकूगु खःसा वय्कःपिं नापं सपथ ग्रहण यानादीम्ह भरतमोहन अधिकारीयात न्हापा हे उपप्रधान नापं अर्थ मन्त्रालयया जिम्मेवारी ब्यूगु खः ।
प्रधानमन्त्री निवास बालुवाटारय् थौं च्वंगु एमाले स्थायी कमिटीया मुँज्यां न्हापा पौडेलयात गृह मन्त्रालय बीगु निर्णययात हीकाः रक्षा मन्त्रालय बीगु निर्णय याःगु खः । उगु मुँज्या एमाले वरिष्ठ नेतात माधवकुमार नेपाल व केपी शर्मा ओली नापं थ्वस्वयां न्हयःया रक्षा मन्त्री नापं एमाले स्थायी कमिटी दुजः विद्यादेवी भण्डारी नं अनुपस्थित जुयादीगु खः ।
