माओवादी शान्ति प्रक्रियाय् प्रतिबद्ध : भट्टराई
एकीकृत नेकपा (माओवादी)या वरिष्ठ नेता व अर्थमन्त्री डा. बाबुराम भट्टराईं नागरिक सर्वोच्चताया निंतिं माओवादीं सरकार त्वतुसां नं शान्ति प्रक्रियाय् प्रतिबद्ध दुगु खँ धयादीगु दु ।
आइतवाः सुथय् अनमिन प्रमुख करिन लेन्डग्रेन दथुइ जूगु खँल्हाबंलाय् वयेकलं थ्व खँ धयादीगु खः । खँल्हाबंलाय् मन्त्री भट्टराईं शान्ति व लोकतन्त्र प्रति माओवादीं या:गु प्रतिबद्धताय् शंका मयायेत लेन्डग्रेनयात इनाप यानादिलसाः अनमिन प्रमुख लेन्डेग्रेनं संयुक्त राष्ट्र संघया सुरक्षा परिषदय् नेपाःया लिपांगु घटनाक्रम बारे सहलह जूगु जानकारी बियादिल ।
पुल्चो स्थित मन्त्री निवासय् जूगु खँल्हाबंलाय् कांग्रेस लगायत दलतय्सं माओवादी जनसेनाया पुनः प्रमाणिकरण यायेत माग यानाच्वंगु विषयलय् नं खँ जूगु खः । मन्त्री भट्टराईं पुनः प्रमाणिकरणया खँ अनावश्यक व औचित्यहीन जूगु धयादिल । नापं वयेकलं हिलावंगु परिवेशष् नकतिनि सार्वजनिक जूगु भिडियो टेपया छुं नं सान्दर्भिकता मदुगु व उकीया बारे भ्रमय् मलायेत लेन्डग्रेनयात इनाप यानादिल ।
खँल्हाबंलाय् शान्ति प्रकृया, न्हूगु सरकार गठन, सेना समायोजन, प्रधानमन्त्रीया भिडियो प्रकरण लगायत समसामयिक राजनीतिक खँय् सहलह जूगु खः ।
