जनविद्रोहया निंतिं मधेसी मोर्चाया तयारी
येँ (सन्ध्या टाइम्स)/संसदय् निर्णायक भूमिका म्हिते मालीगु इलय् व थःपिं सरकारं पिने च्वने मालीगु इलय् जक सक्रिय जुइगु मधेसवादी दलतय्गु मंकाः मोर्चा आः हाकनं आन्दोलनया तयारी याःगु दु। लिपांगु इलय् जनविद्रोह यायेगु धकाः तकं ख्याच्वः बिया वयाच्वंगु उगु मोर्चाया थौं बैठक च्वनाः आन्दोलनया ज्याझ्वः तयार याइ धाःगु दु। झलनाथ खनालया नेतृत्वय् सरकार गठन जुइवं हे मधेसवादी स्वंगू दलतय्गु मंकाः मोर्चा मधेसी मोर्चाया बैठक च्वनाः मधेसया मुद्दायात कयाः जनविद्रोह यायेगु घोषणा याःगु खः ।
खास यानाः मधेसी जनअधिकार फोरम लोकतान्त्रिकया सिंहदरवारय् च्वंगु संसदीय दलया ज्याकुथिइ थौं च्वनी धाःगु बैठक स्थगित जूगु दु। पुलांम्ह प्रधानमन्त्री कृष्णप्रसाद भट्टराई मदुगुलिं उगु बैठक स्थगित याःगु खः ।
मधेसी मोर्चाय् मधेसी जन अधिकार फोरम लोकतान्त्रिक, तराई मधेस लोकतान्त्रिक पार्टी व नेपाल सद्भावना पार्टी दुथ्यानाच्वंगु दु।उगु मोर्चाय् मधेसी जनअधिकार फोरम, तराई मधेस लोकतान्त्रिक पार्टी नेपाल, नेपाल सद्भावना पार्टी आनन्दीदेवी धाःसा दुमथ्याः। मधेसया मुद्दायात कयाः तत्कालिन थीथी सरकारतय्सं याःगु सहमति कार्यान्वय यायेमाः धकाः थःपिं सरकारं पिहां वयेवं सः थ्वयेकेगु यानाच्वंगु उगु मोर्चाया लिपांगु कुतःयात कयाः मोर्चाय् दुमथ्याःगु मधेसवादी दलया नेतातय्सं हे धाःसा आलोचना यानाहःगु दु ।
