परम्परागत दाफा बाजंया प्रयोगात्मक बिचाः गोष्ठी

येँ (सन्ध्या टाइम्स)/नेपाल संगीत तथा नाट्य प्रतिष्ठानया ग्वसालय् "परम्परागत दाफा शास्त्रीय पद्धति" विषयय् छगू बिस्कं कथंया गोष्ठी जुल। प्रतिष्ठानया कुलपति संगीतकार अम्बर गुरुङ्गया सभापतित्वय् न्ह्याःगु उगु ज्याझ्वलय् नेपालभाषा एकेडेमीया कुलपति लिसें संस्कृतिविद् सत्यमोहन जोशी मूपाहां कथं झाःगु खः ।

ज्याझ्वलय् भाजु रुपेन्द्र महर्जनं 'परम्परागत दाफा गायनया पद्धति व प्रयोगात्मक लौकिक शास्त्रीय पक्ष' शीर्षकया ज्यापौ न्ह्यब्वयादीगु खःसा उगु ज्यापौयात कयाः भाजु सुवर्ण शाक्यं टिप्पणी यानादीगु खः ।

ज्याझ्वलय् प्राज्ञ लिसें ज्याझ्वः संयोजक रामकृष्ण दुवालं ज्याझ्वःया बारे जानकारी बिसें मनूतय्सं ब्वनाः मथूगु ज्ञानयात थुइका बीगु आज्जुं हे संगीत प्रतिष्ठानया ग्वसालय् उगु प्रयोगात्मक गोष्ठी यानागु खँ कनादिल। ज्याझ्वलय् किपू थांबहाः दाफा खलःया कलाकारपिंसं दाफा व खिं थानाः प्रयोगात्मक गोष्ठीयात मूर्त रुप बियादीगु खः।
थःगु नुगःखँ तयेगु झ्वलय् के.के. कर्माचार्यं शास्त्रीय संगीत व नाटक अतिकं परम्परागत जूगु खँ थम्हं न्हापांनिसें सीका वयाच्वनागु व प्रतिष्ठानया स्थापनाया आज्जु नं थुज्वःगु परम्परागत संगीतयात म्वाका तयेगु खः धयादिल ।

नेपाल प्रज्ञा प्रतिष्ठानया प्राज्ञ सुलोचना मानन्धरं संगीत प्रतिष्ठानया ग्वसालय् जूगु उगु ज्याझ्वः अतिकं दुलर्भगु ज्याझ्वः खः धासें उकियात भिंतुना बियादिल ।

ज्यापौ न्ह्यब्वसें रुपेन्द्र महर्जनं दाफाय् संकेत दुसुनाच्वनीगु व परम्परा व ऋतुकथं दाफा थायेगु चलन दुगु व थौंकन्हय् ३५ गू राग प्रचलनय् दुगु खँ कनादिल। वाःया न्ह्यन्हुयंकं छसिकथं नासः, कैलाश, गणेश, भगवान, मच्छेन्द्र, असम्भव (कृष्णया गुनगान) व पृथ्वी ग्वारा थायेगु चलन दुगु खँ नं अन कनादिल ।

ज्यापती टिप्पणी यासें सुवर्ण शाक्यं दाफा थायेगु ज्याय् हे मौलिकता व विशेषता दुगु खँ कनादिल। वय्कलं चलन चल्तीइ वयाच्वंगु रागयात नं ज्यापती थाय् बीमाःगु सुझाव बिसें थौंकन्हय्या न्हूगु पुस्तां दाफा बाजं थायेगु सयेकामच्वंगुलिं थुगु संस्कृति ल्यंका तयेमाःगु खँय् बः बियादिल। दाफा बाजं विशेष यानाः शाक्य, मानन्धर व ज्यापु जातिं याकनं मत्वःतीगु बिचाः तसें वय्कलं न्हापा मिसातय्सं नासःद्यःयात थी मजिउगु व पूजा याये मजिउगु लिसें दाफा थाये मजिउगु चलन दुगु खःसां थौंकन्हय् मिसातय्सं नं दाफा थायेगु यानाहःगु नं छगू प्रगतिया हे खँ खः धयादिल ।

मूपाहां सत्यमोहन जोशीं दाफा खिं बाहेक मेमेगु बाजं थायेबलय् रागया आवश्यकता दु धासें दाफा व खिं मौलिक बाजं खः धयादिल। कात्तिक प्याखं क्यनेबलय् नं खिं मथायेकं प्याखंम्वलं पलाः हे मन्ह्याकीगु खँ कँसें वय्कलं उगु प्याखनय् नं खिं बाजंया तःधंगु महत्व दु धयादिल। वय्कलं बाजं व नासःद्यःया पुजा मिस्तय्सं छाय् मयाःगु धइगु बारे लोक बाखं नं न्यंकादिल।
संयोजक रामकृष्ण दुवालं मिथिला, अवधि व नेपालभाषाया म्येँ न्यंकुसें मिथिला व अवधि भाषाय् नं दाफा व खिंया महत्व दुगु खँ कनादिल ।

ज्याझ्वलय् नासः ग्वारा न्ह्यब्वयेगु ज्या जूगु खःसा संयोजक दुवालं आः मेगु ज्यापौ छसिकथं गुंला बाजं, धिमे व नृत्यया विषयय् जुइगु जानकारी बियादिल ।

ज्याझ्वलय् प्रतिष्ठानया सदस्य सचिव तिर्थबहादुर थापां लसकुस यानादीगु खःसा उपकुलपति प्रचण्ड मल्ल, प्राज्ञ मिथिला शर्मा, प्राज्ञ शकुन्तला प्रधानपिनिगु नं उपस्थिति दुगु खः। ज्याझ्वलय् ख्वना, यल, किपू, पांगाया दाफा गुरुपिं नं उपस्थित जुयादीगु खःसा वय्कःपिंसं दाफा बाजंया वर्तमान समस्या बारे कँसें परम्परांनिसें न्ह्याना वयाच्वंगु दाफा बाजंया संरक्षण यायेमाःगु व ब्वलनाच्वंगु समस्याया समाधान याना वनेमाःगु लिसें आर्थिक समस्यां नं थुकी लिच्वः लाकाच्वंगु खँ कनादीगु खः ।