कंसकारया पेशी चैत्र २ गते

विशेष अदालतं नेपाल वायु सेवा निगमया निलम्बित कार्यकारी नायः सुगतरत्न कंसकारया पेशी चैत्र २ गतेया नितिं क्वःछ्यूगु दु । म्हिगः आइतबाःया नितिं क्वःछ्यूगु पेशी पूर्व प्रधानमन्त्री कृष्णप्रसाद भट्टराई मदुगुलिं शोकया बिदा लाःगुलिं चैत्र २ गतेया नितिं चीकूगु अदालतया रजिष्ट्रार धिरबहादुर चन्दं जानकारी बियादिल ।

न्हूगु विमान न्यायेगु नितिं फ्रान्सेली कम्पनी एयर बसयात बैना बिइबलय् भ्रष्टाचार जूगु दाबी यासें अख्तियारं कंसकारविरुद्ध विशेष अदालतय् मुद्दा दायर याःगु खः । धरौटी बिइमफयाः कंसकारयात हिरासतय् तयातःगु खः । खुगू करोड तका धरौटी बिइधुंकाः वय्कः वंगु शुक्रबाः त्वःतूगु खः । कंसकार त्वःतूगु दिं खुन्हु हे एयर बसं बैना रकम लित बिइधुंकूगु दु ।