सेना समायोजनया विषय याकन क्वःछीगु : प्रधानमन्त्री खनाल

प्रधानमन्त्री झलनाथ खनालं सेना समायोजनया विषय याकन हे क्वःछीगु धयादीगु दु । तुरुन्त सेना समायोजन विशेष समितिया बैठक च्वनेगु व सहमतिइ थ्यनीगु वय्कःया विश्वास दु । व्यवस्थापिका संसद बैठकलिपा संविधानसभा भवन परिसरय् थौं सञ्चारकर्मीतलिसे खँल्हासें प्रधानमन्त्री खनालं सेना समायोजन शान्ति प्रक्रियाया महत्वपूर्ण ब्व जूगुलिं थुकियात सरकारं महत्वलिसे काःगु जानकारी बियादिल । सरकारय् हे ब्वति दुगु एकीकृत नेकपा माओवादीं ल्ह्वनाः वयाच्वंगु जनविद्रोहबारे सञ्चारकर्मीया न्ह्यसलय् प्रधानमन्त्री खनालं देय्यात आः जनविद्रोह मजुसे शान्ति व संविधान माःगु दु धयादिल । मन्त्री परिषद विस्तार न्ह्यायेधुंकूगुलिं सरकारं याकनं हे पूर्णता दइगु व सहमति जुइ ल्यं दनिगु विषयलय् नं सहमति जुइगु वय्कःया दाबी खः ।