संविधानया विवाद समाधान यायेत नीस्वंगु उपसमिति निष्कृय
न्हूगु संविधानया विवाद समाधान यायेत नीस्वंगु संबैधानिक समिति अन्तर्गतया उपसमिति निष्कृय जूगु दु । थ्वहे फागुन मसान्ततक्कया विवादीत बिषयलय् सहमति मालाः प्रतिवेदन लःल्हायेगु जिम्मा दुगु उपसमितिया बैठक वंगु शुक्रवाः थुखे च्वनेफूगु मदुनि । लिपांगु इलय् सत्ता राजनीति व पूर्व प्रधानमन्त्री कृष्णप्रसाद भट्टराई मदुगु कारण उपसमिति निष्कृय जूगु खः ।
भट्टराई मदुगु कारण स्वन्हुया राष्ट्रिय शोक लाःगुलिं उपसमितिया वइगु बैठक कंस बुधवाः जक च्वनि । उपसमितिया दुजः नापं जुयाच्वंम्ह सद्भावना पार्टीया नेता लक्ष्मणलाल कर्णं उपसमितिया बैठक कमजोर जुयाः वंगुलिइ च्यूताः नापं प्वंकादिल । क्वःछ्यूगु इलय् ज्या पूवंकेगु प्रतिबद्धता प्वंकादिसें वय्कलं समिति दुजःतय्त गम्भीर जुयाः न्ह्यःज्यायेत नापं इनाप यानालि ।
उपसमितिया थ्व स्वयाः न्ह्यः च्वंगु बैठकं भावी संविधानय् खनेदुगु व्यवस्थापिका अंगदथुइया विवाद अन्त्य यानाः केन्द्रय् प्रतिनिधिसभा व राष्ट्रिय सभा लिसे प्रदेशय् प्रदेशसभा दइकथं सहमति याःगु खः । भावी संविधानया नां, शासकीय स्वरुप, न्यायप्रणाली, संक्रमणकालिन व्यवस्था लगायत महत्वपूर्ण बिषयलय् सहलह हे न्ह्याःगु मदुनि । संविधानया विवादास्पद विषय क्वःचायेकेत उपसमितियात ई आः न्यान्हु जक ल्यं दनि ।
