सुगतरत्न कंसाकार पाखें सुभाय् देछा
नेपाल वायुसेवा निगमया निलम्बित कार्यकारी अध्यक्ष सुगतरत्न कंसाकारं थःगु न्यायया लागिं सः तःपिं सकसितं सुभाय् बियादीगु दु। थौं सुथय् थनया क्षेत्रपाटी पार्टी प्यालेसय् छगू ज्याझ्वः यासें वय्कलं थःत भ्रष्टाचार याःगु धकाः कानूनया गुगु दफापाखें द्वपं बिउगु खः उकियात द्वपं बिउपिंसं गबलें हे पुष्टि याये मफइगु दावी नं यानादिल।
ज्याझ्वलय् नेवाः स्वायत्त राज्य मंकाः संघर्ष समिति सचिवालयया कजि मल्ल के. सुन्दरं देशय् सुगतरत्न थेंज्याःम्ह इमान्दार व अडिग झिम्ह जक कर्मचारी दत धाःसां थ्व देय्या विकास याये फइ धयादिल। न्यायया लागिं नागरिक संघर्ष समितिया संयोजक सुजीव वज्राचार्यं कंसाकारयात न्याय बीगु आन्दोलन अझं क्वमचाःनिगु कारणं नेवाःतय्सं अझ नं शक्ति क्यनाः न्ह्यःने वनेमाः धयादिल।
ज्याझ्वलय् सभासद् दिलीप महर्जन, तिर्थराम डंगोल, बुद्ध साय्मि, एमालेया कृष्णगोपाल श्रेष्ठ, कांग्रेसया भिमसेनदास प्रधान, नेवानि कर्मचारी संघया नायः तारिणी दाहालपिंसं नं न्ववानादीगु खः। ज्याझ्वः भाजु कंसाकारया दाजु त्रिलोकीरत्न कंसाकारया सभापतित्वय् जूगु खः।
