थःपिनि मन्त्रीतय्त प्रचण्डया निर्देशन
थःगु पार्टीपाखें सरकारय् वंपिं मन्त्रीतय्त एकीकृत नेकपा माओवादीया नायः प्रचण्डं जनताया पक्षय् ज्या यायेत निर्देशन बियादीगु दु । प्रचण्डं शान्ति, संविधान, राष्ट्रियता व जनजीविकायात प्राथामिकताय् तयाः ज्या यायेत निर्देशन ब्यूगु पर्यटन लिसे नागरिक उड्डयन मन्त्री खड्गबहादुर विश्कर्मां जानकारी बियादिल ।
न्हापाया एमाले नेता माधवकुमार नेपाल नेतृत्वया सरकारया मन्त्रीतय्सं बांलाःगु ज्या यायेमफूगु व मन्त्रालयत नापं भ्रष्टाचारया अखडा जूगु खँ वयाच्वंगु इलय् प्रचण्डं थःगु पार्टीया मन्त्रीतय्त जनपक्षीय ज्या यायेत निर्देशन बियादीगु खः ।
उपप्रधान लिसे सञ्चारमन्त्री कृष्णबहादुर महरालिसे शान्ति लिसे पुनःनिर्माणमन्त्री वर्षमान पुन 'अनन्त', भौतिक योजना लिसे निर्माणमन्त्री टोपबहादुर रायमाझी व पर्यटन लिसे नागरिक उड्डयनमन्त्री खड्कबहादुर विश्वकर्मा प्रचण्ड निवास न्हूगु बजाः थ्यंकादीगु खः । नापलाये ज्याय् मन्त्रीतय्सं थःपिनिगु मन्त्रालयया आःया अवस्था व यायेफइगु ज्याया बारे नायः प्रचण्डयात जानकारी ब्यूगु खः ।
