संसद व समिति स्थगित
थौंया नितिं सःतूगु व्यवस्थापिका संसदया वैठक स्थगित जूगु दु । नेपाली कांग्रेसया संस्थापक नेता लिसे प्रजातन्त्र प्राप्तीलिपाया न्हापांम्ह सभामुख कृष्ण प्रसाद भट्टराई मदुगु कारण थौंया वैठक सुचं तिकाः स्थगित याःगु संसद सचिवालयया श्रोतं जानकारी ब्यूगु दु ।
पुर्व सभामुख लिसे सभासद् मदुगुलिं संसदया वैठकं शोक प्रस्ताव पारित यायेत वैठक च्वनेगु याःसां नं वय्कःया अन्त्यस्टी नापं मजूगुलिं थौंया वैठक स्थगित याःगु खः । सरकारं नापं स्वन्हुतक्क राष्ट्रिय शोक व थौं सार्वजनिक विदाया घोषणा याःगु खः ।
अथेहे थौं सुथसिया नितिं सःतूगु संविधानसभा संवैधानिक समिति अन्तर्गतया विवाद समाधान उपसमितिया वैठक नं प्रभावित जूगु दु । संविधानया विवादीत विषयलय् सहमति मालेत च्वने धयातःगु वैठक वइगु २५ गतेतक्कया नितिं स्थगित याःगु समितिया दुजः लिसे डा. प्रकाशचन्द्र लोहनीं जानकारी बियादिल ।
