एअरबस कम्पनीं नेवानिया बैना दां लित छ्वया हल
येँ (सन्ध्या टाइम्स)/नेपाल वायुसेवा निगमं विमान न्यायेगु लागिं फ्रान्सया एअरबस कम्पनीयात बैना कथं छ्वयातःगु दां थौं लित छ्वया हःगु दु ।
एअरबसयात उगु दां बैना बिउगु द्वपनय् नेपाल वायुसेवा निगमया तत्कालिन कार्यकारी अध्यक्ष सुगतरत्न कंसाकारयात अख्तियारं भ्रष्टाचार याःगु द्वपं बिसें मुद्दा चले यानाः जेल चलान समेत याःगु खः ।
थ्व प्रकरणय् कंसाकारयात कारवाही याःगु खँ सीवं एअरबस कम्पनीं बैनाया दां लित बीगु जानकारी बिउगु खःसा निगमं बैंक खाता नम्बर बियाछ्वःगु खः। निगमं येँया हिमालयन बैंकया खाता नम्बर बिया छ्वःगु खः। निगमं बियाछ्वःगु खाता नम्बरय् थौं एअरबसं ध्यबा छ्वया हःगु खः ।
निगम सूत्रं बिउगु जानकारी कथं हिमालयन बैंकं उगु दां काये धुंकूगु दु। आः निगमं उगु दां थःपिनि नियमित खाताय् मुंकीगु खँ धाःगु दु ।
उखे विशेष अदालतं माग याःगु ६ करोड दांया बैंक ग्यारेन्टी प्राप्त जुइवं हिरासतय् लानाच्वंम्ह भाजु कंसाकारयात नं थौं त्वःता हःगु दु। येँया प्राइम कमर्सियल बैंकं वय्कःया ग्यारेन्टी च्वना बिउगु खः ।
