उदयपुरय् थौं सुकुन्दा र्याली, कन्हसंनिसें नेवाः महोत्सव
उदयपुरया सदरमुकाम गाईघाटय् कन्हसंनिसें नेवाः महोत्सव जुइगु जूगु दु । कन्हय् फागुन २१ गते निसें २४ गते तक न्ह्याइगु थुगु नेवाः महोत्सव स्थानिय त्रियुगा उच्च मा.वि.या ख्यलय् जिल्ला प्रमुख अधिकारीं उलेज्या याइगु ज्याझ्वः दु ।
थुकिया नायखिं च्वयेकुसें थौं छगू सुकुन्दा र्याली पिदंगु खः । नेवाः बाजं धिमे थाना चाःह्यूगु सुकुन्दा र्यालीइ वःपिं आपासिनं नेवाः वसः ज्यापु लं व हाकुपतासी सिनावःगु खःसा र्यालीं नगरपरिक्रमा याःगु खः ।
नेवाः महोत्सवया लागि माःगु सल्लाह बिया ग्वहालि यानादीम्ह ख्वपया भाजु गणेशराम लाछिजुं महोत्सव जःछि थीथी नेवाः स्टल व थीथी साँस्कृतिक ज्याझ्वःया लागिं कलाकारत अन ब्वनायंकूगु खः । मध्यपुर कला परिषदया कलाकारतय्गु नेतृत्व यासें भाजु लाछि म्हीग हे उदय्पुरया गाईघाटय् थ्यंगु खः । २४ गते तःजिक नेवाः भ्वय् नकेगु ज्याझ्वः दुगु व थीथी व्यापारिक स्टल लिसें नेवाः नसाःया स्टलत दइगु खँ भाजु लाछिजुं नेपालमण्डल डटकमयात जानकारी बियादिल ।
थुगु उदय्पुर नेवाः महोत्सव नेवाः देय् दबू उदय्पुरया ग्वहालिइ झीगु नेवाः पुचः, गाईघाट, उदय्पुरया ग्वसालय् जुइगु खः ।
लाहानय् नं नेवाः महोत्सव
सगरमाथा अंचलयात हे कःघानां लाहानय् नं म्हिगःनिसें झिन्हुयंकंया नेवाः महोत्सव जुयाच्वंगु दु । म्हिगःनिसें शुरु जूगु थुगु महोत्सव नेवाः समाज, लहानया ग्वसालय् जुयाच्वंगु खः ।
लाहानय् नं थीथी नेवाः प्याखँ, नेवाः नसा व नेवाः तजिलजिया थीथी झाँकी ब्वज्या जुयाच्वंगु खःसा थुकिया लागिं नं मध्यपुर कला परिषदया कलाकारिपं हे अन झायाच्वनादीगु खः ।
Related Stories
कन्हसंनिसें किपू महोत्सव, उदयपुरय् नं नेवाः महोत्सव जुइगु
