लोचनतारा व विमलयात जरिमैयाँ सिरपाः

ख्वप (सन्ध्या टाइम्स)/ नेपालभाषा साहित्यया लागाय् सिर्जनशील मिसा च्वमिपिंत बिया वयाच्वंगु जरिमैयाँ साखः लुमन्ति सिरपा: थुगुसी बाखंच्वमि लोचनतारा तुलाधरयात बीगु क्वःछिउगु दु। स्वंगू दशकंनिसें नेवाः भाय्या बाखं ख्यलय् न्ह्यथनेबहःगु तिबः बिउगुलिं वय्कःयात सिरपाः बीगु क्वःछिउगु खः। बाखंमि तुलाधरया 'पलासु' व 'दुवाः ध्वदुकेत' नांया निगू बाखं सफू पिदंगु दु।
अथेहे थुगुसीनिसें मिजं च्वमिपिंत नं जरिमैयाँ साखः लुमन्ति सिरपाः बीगु क्वःछिनाकथं न्हूम्ह बाखं च्वमि विमल ताम्राकारयात बीगु क्वःछिउगु दु ।

नेपाल साहित्य मन्दिरया नकतिनि च्वंगु बैठकं ल्यज्या पुचःया सिफारिसकथं वय्कःपिंत सिरपाः बीगु क्वःछिउगु खः। सिरपाय् झिद्वः दां व हनापौ दु। समाजसेवी कुमार साखं छगू अक्षयकोष दयेकाः पलिस्था यानातःगु थ्व सिरपाः थ्वया न्ह्यः मिसा च्वमिपिं प्रतिसरा साय्मि, उपन्यासकार शशिकला मानन्धर, समालोचक प्रेमशान्ति तुलाधर व बाखंच्वमि सुवर्णकेशरी चित्रकारयात बीधुंकूगु दु। सिरपाः थ्वहे फागुन २४ गते नारी दिवस कुन्हु लःल्हाइगु ज्याझ्वः दु ।