'समय्बजि'या स्वसःब्व
येँ (सन्ध्या टाइम्स)/इमेज च्यानलं प्रसारण जुयाच्वंगु नेपालभाषाया ज्याझ्वः 'समय्बजि' स्वसःब्व थ्यन। थ्व झ्वलय् छगू ज्याझ्वः यासें स्वसःब्वया लसता हन। ज्याझ्वः इमेज च्यानलय् न्वकु इन्दिरा मानन्धर नापं मेम्ह न्वकु मोहनचन्द्र सिंहं उलेज्या यानादीगु खः। मय्जु मानन्धरं कलाकारपिनि मेहनत व स्वकुमिपिनि मतिनां यानाः हे थौं 'समय्बजि' स्वसःब्व थ्यंकेत ताःलागु खः धयादिल ।
ज्याझ्वलय् नृत्य निर्देशक राज शाही, जनकवि दुर्गालाल श्रेष्ठ व डल्लु आवासीय विद्यालययात हनेगु नापं 'समय्बजि' ज्याझ्वःयात ग्वाहालि यानादीपिं कलाकार व प्राविधिकतय्त सुभाय्पौ लःल्हायेगु ज्या नं जूगु खः।
ज्याझ्वलय् भोगेन्द्र मानन्धर, बिनु मानन्धर, सुरेन्द्र मिजला मानन्धर, रीना महर्जन, सतिश महर्जन, राजन शाहीपिंसं हुलाप्याखं न्ह्यब्वयादीगु खःसा रीता महर्जन, सतीश महर्जन, विनोद मानन्धर, सरस्वती मानन्धर, सुलिन्द्र शाक्यपिंसं म्येँ हालादीगु खः। चःमति नेवाः खलःया मिसा कलाकारपिंसं धिमे न्ह्यब्वःगु खः ।
ज्याझ्वलय् ख्यालः क्यनाः न्ह्यइपुकेगु ज्या नं जूगु खः ।
