पृथ्वीया मू ३,००० अर्ब पाउण्ड !
येँ (सन्ध्या टाइम्स)/नेपालय् जग्गाया भाः थहां वंगुलिं ३ आना जग्गा न्याये मफयाः मनूत हैरान जुयाच्वंगु दु। तर ३ आना जक मखु, पृथ्वी छगलं हे न्याये माल धाःसा उकिया भाः गुलि थ्यनीगु जुइ? पृथ्वी छगलंया जग्गा, अन दुगु खनिज, उकिया आयु, तापक्रम आदिया ल्याःचाः पिकयाः लण्डनया छम्ह खगोल-भौतिकशास्त्रीं पृथ्वीया भाः क्वःछिउगु दु। वं तःगु भाः कथं पृथ्वीया मू ३००० खर्ब पाउण्ड तू। अर्थात छिके ३००० खर्ब पाउण्ड ध्यबा दःसा पृथ्वी छगलं न्याना काःसां जिउ। खगोल-भौतिकशास्त्री ग्रेग लौग्लिनं पृथ्वीया मूल्यांकन यासें थ्व भाः क्वःछिउगु खः ।
वय्कःया कथं थ्व ब्रम्हाण्डय् दुगु सम्पूर्ण ग्रह मध्ये पृथ्वी दकलय् थिकेगु ग्रह खः। थौंकन्हय् चर्चाया विषय जुयाच्वंगु मंगल ग्रहया मू झिद्वः पाउण्ड जक तूगु खँ नं लौग्लिनं धाःगु दु। वय्कःया कथं वरुण दकलय् मूल्यहिन ग्रह खः। थ्व ग्रहया मूल्य दांछि हे मतू ।
ब्रम्हाण्डय् १२३५ गः ग्रह दु धइगु अनुमान दु। तर उकी मध्ये अप्वः ग्रहया दांछि हे मवं। ग्रेग लौग्लिनया बिचाः कथं पृथ्वीया मू गुलि तू धइगु खँ थुल कि मनूतय्त थः च्वंच्वनागु पृथ्वी प्रति मतिना अप्वया वनीगु सम्भावना दइ लिसें पृथ्वी बचे यायेगुपाखे लगे जुइ फइ ।
