कारवाही फुकुवा मजूतले ज्या ठप्प
येँ (सन्ध्या टाइम्स)/नेपाल वायुसेवा निगमया निलम्बित कार्यकारी अध्यक्ष सुगतरत्न कंसाकारं युरोपया एअरबसयात विमान न्यायेत छ्वःगु ५ करोड चाःचू बैना दां सम्भवतः थौं वा कन्हय् तकया दुने लिहां वयेफुगु अनुमान याःगु दु। निगमया कर्मचारीतय्सं दवाव बियाः म्हीग निगमया वर्तमान कार्यकारी अधिकृत केबी लिम्बुयात बैना दां लित कायेगु बारे पौ च्वके बिउगु खः। उगु दां लिहां वयेसातकि आइतवाः अदालतय् जुइगु थ्व सम्बन्धी पेशीं कंसाकारयात त्वःतेगु फैसला न्यंके फुगु नं आशा याःगु दु। आइतवाः पेशी जुइ कुन्हु स्वनिगःया नेवाःतय्सं पसः बन्द यानाः ऐक्यवद्धता क्यनेत नेवाः जागरण मञ्चं आह्वान याःगु दु ।
मेखे भाजु कंसाकारया कारवाही फुकुवा मजूतले नेवानिया कर्मचारीतय्सं ज्या ठप्प यायेगु निर्णय याःगु दु। म्हिगः कर्मचारीतय्सं डिल्लीबजार तक जुलुस पिकाःगु खःसा म्हिगः हे नेवाः जागरण मञ्चया पहलय् नेवाःतय्सं नं छगू जुलुस पिकाःगु खः। कंसाकार धाःसा म्हिगः छातीया समस्यां यानाः त्रिपुरेश्वरया काठमाडौं अस्पताल भर्ना जुयादीगु दु ।
