थौं सिलाचःह्रे

थौं सिलाचःह्रे अर्थात हिन्दू धर्मालम्बीतय् तःधंगु पर्व शिवरात्रि । हिन्दूमार्गी नेवाःत नापं मेमेगू समुदायया हिन्दूतय्सं महाद्यःया पूजा अर्चना यानाः थुगु पर्व हनाच्वंगु दु । थौं विशेष यानाः पशुपतिइ वनाः महाद्यःया पुजा याइपिं भक्तजनतय् भीड सुथनिसें तःधंगु ल्याखय् दु । अन भक्तजनतय् दर्शनया निंतिं पशुपति क्षेत्र विकास कोषं थीथी व्यवस्था यानातःगु दु ।

भक्तजनतय् सुविधाया निंतिं न्याद्वः स्वयमसेवक व सुरक्षाया निंतिं थ्यंमथ्यं प्यद्वः सुरक्षाकर्मीत परिचालन यानातःगु दु । समितिं थौं च्यागुलख भक्तजनतय्सं पशुपतिया दर्शन याइगु अनुमान यानातःगु दु ।