स्वम्ह सशस्त्र प्रहरी घौछि एसएसबीया नियन्त्रणय्

नेपाःया स्वम्ह सशस्त्र प्रहरीयात भारतीय सिमा सुरक्षा बल एसएसबीं घौछि नियन्त्रणय् तयाः त्वःतुगु दु ।

बुधवाः सुथय् भारतं जाकि न्याना साइकलय् नेपाःया रौतहट बन्जाराहा गाविस लिहांवयाच्वम्ह मोहमम्द आफताबयात एसएसबीं नियन्त्रणय् कयाः दाःगु विरोधय् नेपाःमितय्सं निम्ह एसएसबीयात नियन्त्रणय् काःगु खः । उकीया बदला स्वरुप एसएसबीया जवनतय्सं रौतहटया औरेया स्वम्ह सशस्त्र प्रहरीयात नियन्त्रणय् काःगु खः । लिपा नेपाली सुरक्षाकर्मीतय्सं एसएसबीया जवानतय्त त्वःतेवं एसएसबीं नं स्वम्ह सशस्त्र जवानयात त्वःतुगु खः ।

थ्वस्वयां न्ह्यः एसएसबीं नेपाःमियात दुर्व्यवहार यायेवं रौतहट बन्जाराया अवस्था तनावग्रस्त जूगु खःसा लिपा निगूलिं पक्षं ज्वनातःपिं मनूत त्वःतेवं स्थिति सामान्य जूगु खः ।