मिसा पत्रकारतय्त रासस निःशुल्क यायेत माग

येँ (सन्ध्या टाइम्स)/थीथी सञ्चार माध्यमय् ज्या यानाच्वंपिं देय्न्यंकंया मिसापिं पत्रकारतय् भेला नकतिनि क्वचाल। सञ्चारख्यलय् मिसापिनि ल्याः अप्वयेकेगु ताः तयाः सक्रिय जुयाच्वंगु 'क्रियाशील पत्रकार महिला (डब्लुडब्लुजे)'या ग्वसालय् उगु भेला जूगु खः ।

स्वनिगः नापं देय्या झिंन्ह्य्गू जिल्लाय् शाखा स्वनेधुंकूगु थुगु संस्थां वंगु शनिवाः व आइतवाः उगु भेला याःगु खः। भेलाय् पत्रकार मिसातय्त प्रशंसनीय दृष्टिकोण व थुकिया लिच्वःया विषयय् तालिम नं बीगु ज्या जूगु खः। बुद्धि तामाङ्गं बियादीगु उगु तालिमय् सहभागी पत्रकार मिसातय्त प्यंगः 'स' (सोधखोज, सपना, संचालन व संरचना) या चक्र बारे कनेगु व सम्बन्धित विषयया प्रयोगात्मक अभ्यास नं याकूगु खः। वय्कलं प्रशंसनीय दृष्टिकोणया सकारात्मक व नकारात्मक लिच्वः बारे नं कना�दीगु खः। दुरदृष्टि नेतृत्व विकास, प्रशंसनीय दृष्टिकोण व अवधारणा, सहभागीतय्गु व्यक्तिगत परिकल्पना व योजना, सकारात्मक सोचया विकास थेंज्याःगु आज्जु तयाः जूगु उगु तालिमय् थीथी किपात क्यनाः सामान्य मनूतय्सं व पत्रकारं स्वयेगु दृष्टिकोणय् गुज्वःगु परिवर्तन दु धइगु खँ प्रस्ट याःगु खः ।

केन्द्रीय उपाध्यक्ष शुभेच्छा विन्दु तुलाधरं न्यादँ न्ह्यः संघं पारित याःगु १५ बुँदे घोषणापत्र न्यंकुसें उकी छुं बुँदात हीकाः आः न्हूगु न्हूगु घोषणा पत्र तयार यायेगु खँ कनादिल ।

राससया अध्यक्षया नं उपस्थिति दुगु उगु ज्याझ्वलय् वय्कलं राससया समाचार मिस्तपाखें संचालित संचार माध्यमं निःशुल्क चले याये दयेमाः धइगु प्रस्ताव तयादीगु खः ।

व्यावहारिक, मर्यादित, जिम्मेवार पत्रकारिताया विकास यायेगु ताः तयाः नीस्वंगु थुगु संस्थां देय्या फुक्क जिल्लाय् थःगु शाखा स्वनाः मिसापिं पत्रकारत अप्वयेका यंकेगु लक्ष्य तःगु दु। थीथी जिल्लाय् थःपिनि ज्यापाखें सकारात्मक लिच्वः लानाच्वंगु खँ संस्थाया नायः संगीता लामां कनादिल ।