'छन्हु-निन्हुया दुने हे महत्वपूर्ण निर्णय'
एकीकृत नेकपा (माओवादी)या नायः पुष्पकमल दाहाल 'प्रचण्डं' माओवादीं छन्हु-निन्हुया दुने हे महत्वपूर्ण निर्णय याइगु खँ धयादीगु दु । नेकपा (एमाले)या नायः झलनाथ खनालयात प्रधानमन्त्री दयेकाः माओवादीं प्रतिक्रियावादीतय्त न्यतालय् दायागु धयादिसें वय्कलं छन्हु-निन्हु दुने हानं मेगू महत्वपूर्ण निर्णय यानाः प्रतिक्रियावादीतय् मेगू न्यतालय् नं दायेगु धयादिल ।
पुर्नगठित नेकपा (मसाल) व माओवादी पार्टीया एकता सभाय् नायः प्रचण्डं माओवादीं याकनं याइगु निर्णय नापं वर्तमान सरकारं पूर्णता काइगु विश्वास प्वंकादिल ।
डिलाराम आचार्यं नेतृत्व यानादीगु पुनर्गठित मसाल माओवादीलिसे एकता याःगु खः । पुनर्गठित मसालया संयोजक डिलाराम आचार्यया नेतृत्वय् १५ म्हेसिया केन्द्रीय समिति दु । मोहनविक्रम सिंहया नेतृत्वय् दुगु मसालया बैधानिक मोर्चा जनमोर्चा (चित्रबहादुर केसीया नेतृत्वय् दुगु )पाखें आचार्यया पुचः ई न्ह्यः ब्यागलं जूगु खः।
