कासाय् ब्वति काःवंपिं न्याम्ह दुर्घटनाय् लानाः सित
येँ (सन्ध्या टाइम्स)/थौं जुइगु भलिबल व बास्केटबल कासाय् ब्वति कायेत वनाच्वंपिं यात्रुत च्वनावंगु जीप दुर्घटना जुयाः न्याम्ह मनू सीगु दुसा मेपिं न्याम्ह घाःपाः जूगु दु ।
बागलुङया मल्म गाविसया डाग्दीनंगु खुसिइ वंगु चान्हय् जिप दुर्घटना जुयाः पाण्डपबखानी गाविसया ४४ दँ दुम्ह भक्तबहादुर पुन, २५ दँया श्याम काउचा मगर, २३ दँया दिनेश श्रीष, २० दँया विक्रम श्रीष व १८ दँया दिपक पुन सीगु दु ।
उपिं च्वनावंगु ना. १ ज १२८६ नम्बरया जिप लँ स्वयां अथे हे २०० मिटर क्वय् खुसिइ कुतुं वनाः दुर्घटना जूगु खः। उकी लानाः वहे लागाय् च्वंपिं मेपिं न्याम्ह यात्रुत घाःपाः जूगु खः। २६ दँया चालक चित्रबहादुर मगर नं घाःपाः जूगु दु। घटनास्थलय् चछि हे स्थानीय मनूत नापं प्रहरीं उद्धार याःगु खः। बाग्लुङ्गय् थौं जुइगु स्थानीयस्तरया भलिबल व बास्केटबल कासाय् ब्वति काः वनाच्वंपिं उपिं कासामि हे खः वा मखु धइगु खँ धाःसा सीमदुनि ।
