एकीकृत माओवादी व मसाल पार्टी एकता
येँ (सन्ध्या टाइम्स)/एकीकृत माओवादीं चिचीधंगु कम्युनिष्ट पाटीलिसे एकता यायेगु झ्वलय् थौं डिलाराम आचार्यं नेतृत्व यानादीगु पुनर्गठित नेकपा (मसाल) लिसे एकता याइगु जूगु दु ।
थौं सनिलय् येँया राष्ट्रिय नाचघर जमलय् छगू ज्याझ्वः यासें निगू पार्टी दथुइ एकता घोषणा याइगु ग्वसाः दु। पुनर्गठित मसालया संयोजक डिलाराम आचार्यया नेतृत्वय् १५ म्हेसिया केन्द्रीय समिति दु ।
उगु समितिइ गिरिधारी न्यौपाने, कमल खनाल, निमानन्द गैरे, ईन्द्रमणि पौडेल, सिद्धराज भाट, रामआशिष महतो, रामलाल खनाल, चोपलाल आचार्य, धर्मराज रेग्मी, युवराज पोखरेल, प्रभु यादव, नन्दलाल धामी, मधु क्षेत्री व देवसिंह महरा दुथ्यानाच्वंगु दु। वय्कःपिं मध्ये डिलाराम आचार्य व गिरिधारी न्यौपानेयात एकता लिपा एकीकृत माओवादीया पोलिटब्यूरो सदस्य अले मेमेपिंत केन्द्रीय सदस्या दयेकीगु ग्वसाः दु ।
म्हिगः व म्हीग जक जूगु पुनर्गठित नेकपा (मसाल)या विशेष राष्ट्रिय भेलां विश्व कम्युनिष्ट आन्दोलनयात गति बीत नापं कम्युनिष्ट धुवीकरणया नितिं एकीकृत माओवादीलिसे एकता यायेगु धकाः सर्वसहमत निर्णय याःगु खः ।
मोहनविक्रम सिंहया नेतृत्वय् दुगु नेकपा (मसाल)या बैधानिक मोर्चा जनमोर्चापाखें आचार्यया पुचः ब्यागलं जूगु खः। मसालया बैधानिक मोर्चा जनमोर्चाया नेतृत्व धाःसा आः चित्रबहादुर केसीं यानाच्वंगु दु ।
