नेवाः जागरणया दुजः इनेज्या
येँ (सन्ध्या टाइम्स)/नेवाः जागरण मञ्च तदर्थ समितिपाखें वंगु शनिवाः छगू ज्याझ्वः यासें नेवाः जागरण व्यापारी मञ्च व नेवाः जागरण सुरक्षाकःमि मञ्चय् संगठित दुजःपिंत दुजःपौ इन। मूपाहांकथं झाःम्ह मञ्चया सल्लाहकार कृष्णगोपाल श्रेष्ठं दुजःपौ इनादीगु खः ।
मञ्चया संयोजक सुजीव बज्राचार्यया सभापतित्वय् जूगु उगु ज्याझ्वलय् न्ववासें भाजु श्रेष्ठं गुगं नं संगठनय् दुजः जुइगु उगु संगठनय् आवद्ध जुइपिनि निंतिं तसकं तःधंगु खँ जुइगु नापं थुकिं संगठनय् दुने अधिकार व कर्तव्य सुनिश्चित याइगु विचाः प्वंकादिल। मेम्ह पाहां नेवाः जागरण व्यापारी मञ्चया सल्लाहकार मेघबहादुर श्रेष्ठं नेवाःत थःत छुं परे जुइबलय् जक मनू माः जुइगु व्यवहार त्वःताः न्हापा हे संगठित जुयाः थवंथवय् ग्वाहालि दयेका जुइमाः धयादिल। ज्याझ्वलय् ५० म्हसिनं दुजःपौ लःल्हाना काःगु खः ।
मञ्चपाखें मेगु शनिवाः नं दुजःपौ लःल्हाइगु ज्याझ्वः दु ।
