उदाय् समाजया 'उदाय् छेँ' उलेज्या
येँ (सन्ध्या टाइम्स)/उदाय् समाजया थःगु हे छेँ शनिवाः छगू ज्याझ्वःया दथुइ उलेज्या जुल। येँया असं, न्हाय्कं त्वालय् च्वंगु उदाय समाजया उगु छेँ समाजया संरक्षकपिं कुलवीरसिंह तुलाधर व द्रव्यमानसिंह तुलाधरपिंसं मंकाः कथं यानादीगु खः ।
उदाय् समाजया नायः डा. रुपज्योति कसाःया सभापतित्वय् जूगु उगु ज्याझ्वलय् उगु छेँया दातापिं पद्मज्योति कसाः, डा. रुपज्योति कसाः व दानरत्न तुलाधरपिंत समाजया संस्थापक नायः नानीभाइ स्थापितं सुभाय्पौ लःल्हानादिल। अथे हे उदाय् समाजया स्थापनाकालंनिसें धालसिक्व बहाःया थःगु छेँया दलान कवः समाजया ज्याकू चायेकेत निःशुल्क बियादीम्ह संरक्षक कुलवीर सिंह तुलाधरयात नं सुभाय्पौ देछाःगु खः।
ज्याझ्वलय् समाजया मूछ्यांज्ये रत्नकाजी तुलाधरं लसकुस यानादीगु खःसा उदायछेँ स्यंल्ह्वंया भाला कयादीम्ह दुजः धर्मरत्न कसां स्यंल्ह्वंया ल्याःचाः न्ह्यब्वयादिल ।
अथे हे उदाय मुना ज्याझ्वःया संयोजक डा. प्रेमरत्न स्थापितं थ्वहे वगु वैशाख ३ गते येँया भृकुटीमण्डपय् जुइगु उदाय मुना ज्याझ्वःया तयारी बारे जुयाच्वंगु ज्याखँ कनादिलसा उदाय् मुना ब्वज्या कमिटीया संयोजक प्रो. प्रेमशान्ति तुलाधरं उदाय् मुना ज्याझ्वलय् संस्कृति खने दइकथंया हलंज्वलंत ब्वयेगु खँ कनादिल ।
