न्हूगु सरकार गठन बारे फोरम अस्पष्ट
न्हूगु सरकार गठन यायेत तःधंगु भुमिका दुगु मधेशी जनअधिकार फोरमं न्हूगु गठबन्ध सरकारया निंतिं सुयात समर्थन यायेगु धइगु खँय् अझ मौन च्वंगु दु ।
शनिवाः फोरमया संसदीय ज्याकूथीइ पार्टीया धापू सार्वजनिक यायेत याःगु पत्रकार सम्मेलनय् मधेशीतय् मागयात सुनां समर्थन याइ वहे पार्टीयात न्हूगु सरकार गठन यायेत ग्वहालि यायेगु खँ फोरम अध्यक्ष उपेन्द्र यादवं धयादिल । वयेकलं कांग्रेस-एमालेया गठबन्धन वा माओवादी सयाःगु पक्षय् वनेगु धकाः स्पष्ट यानामदी ।
सम्मेलनय् गुंगू बुँदे निर्णयत सार्वजनिक यासें फोरमं सरकार गठनया खँय् थीथी दलतनाप वार्ता यायेत फोरम नेता जयप्रकाश प्रसाद गुप्ताया संयोजकत्वय् रमा साह यादव व जितेन्द्र देव दुथ्याःगु छगू समिति गठन याःगु दु ।
अथेहे फोरमं प्रधानसेनापति रुक्मांग कटवालयात पदय् च्वनाच्वनेत राष्ट्रपति डा. रामवरण यादवं ब्यूगु निर्देशनयात संविधान विपरित ज्या धासें विरोध याःगु दु । नापं प्रधानमन्त्री पुष्पकमल दाहाल प्रचण्डं सहमति विपरित प्रधानसेनापतियात कारवाही याःगुलि असहमति प्वंकूगु दु ।
