लोडसेडिङ विरुद्ध नेवाःतय् धर्ना
लोडसेडिङया अत्याधिक मारय् लानाच्वंपिं स्वनिगःया नेवाःत लोडसेडिङ विरुद्ध कुहांवःगु दु । नेपालय् दलकय् अप्वः देय्या हे राजधानी लाःगु स्वनिगःलय् न्हि झिंप्यघौया अन्धकारय् च्वनेत बाध्य जूपिं नेवाःतय्सं आइतवाः सतकय् प्रदर्शन याःगु खः ।
नेवाः जागरण मञ्चया नेतृत्वय् कुहांवःपिं नेवाःतय्सं थौं रत्नपार्कय् च्वंगु विद्युत प्राधिकरणय् धर्ना ब्यूगु खः । धर्ना च्वनाच्वंपिं प्रदर्शनकारीतय्सं उगु क्षेत्रय् छुं ई चक्काजाम तकं याःगु खः ।
उगु इलय् जागरण मञ्चया कजि सुजीव बज्राचार्यं नेपाल विद्युत प्राधिकरणया कार्यकारी प्रमुख दिगम्बर झायात छगू ज्ञापनपौ लःल्हाःगु खः । ज्ञापनपौ लःल्हाय् इलय् नेवाः सभासद्त हिसिला यमि, तिर्थराम डंगोल नापं एमाले नेता कृष्णगोपाल श्रेष्ठ, नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दर लगायतया ब्वति दुगु खः ।
ज्ञापनपौ लःल्हाना कयादिसें कार्यकारी प्रमुख झां असमान रुपं स्वनिगलय् नेपाःया मेमेगू क्षेत्रय् स्वयां अप्वः लोडसेडिङ जुयाच्वंगु स्वीकार यानादीसां थुकीयात म्हो यायेगु बारे छुं धयामदी । झाया स्पष्ट लिसः मवेवं ज्ञापनपौ लःल्हायेत वःपिं प्रतिनिधितय्सं प्राधिकरणयात लोडसेडिङ म्हो यायेगु बारे तत्काल यायेफइगु योजना सहित छवाःया दुने पेश यायेत धाःगु खः । नापं उगु इलय् नेवाःतय्गु थौंया विरोधयात सांकेतिक रुपं जक कायेत इनाप यासें थुकीयात बेवास्ता याःसा लिच्वः बांमलाइगु ख्याच्वः तकं ब्यूगु खः ।
