माओवादीनाप एमालें निर्णायक वार्ता याइगु
एकीकृत नेकपा (माओवादी)या ग्वाहालिइ नेकपा (एमाले)या नायः झलनाथ खनाल प्रधानमन्त्री जूगु स्ववाः दयेधुंकाः नं मन्त्रिमण्डल विस्तार यायेत समस्या जुइवं एमालें माओवादीनाप निर्णायक वार्ता याइगु जूगु दु ।
एमालेया थौं च्वंगु स्थायी कमिटीया मुँज्यां पार्टीया पुलांगु अडानयात कयाम हे तयाः माओवादीनाप निर्णायक वार्ता यायेगु खँ क्वःछिउगु खः । एमालें थ्वस्वयां न्ह्यः गृह व रक्षा नापं सुरक्षा सम्बन्धी मन्त्रालयत माओवादीयात मबीगु निर्णय याःगु खः । थौं सिंहदरवार स्थित एमाले संसदीय दलया सभाकक्षय् च्वंगु मुँज्यां सत्ता बाँडफाँट नापं सरकारया न्यूनतम मंकाः ज्याझ्वःया बारे वार्ता यायेगु निर्णय याःगु खः ।
मुँज्या लिपा एमाले मू छ्याञ्जे इश्वर पोखरेलं एमालें थ्वस्वयां न्ह्यः याःगु निर्णयलय् अडिग जुयाः माओवादीनाप निर्णायक वार्ता यायेगु कनादिल । वय्कलं माओवादीनाप वार्ता यानाः कन्हय्या दुने मन्त्रिपरिषद् विस्तार यायेगु बारे क्वःछीगु जानकारी बियादिल ।
