कंसाकारयात जेल चलान

नेपाल वायु सेवा निगमया कार्यकारी अध्यक्ष सुगतरत्न कंसाकारयात आइतवाः जेल चलान याःगु दु ।

विमान न्यायेगु प्रकरणय् भ्रष्टाचार याःगु द्वपं लाःम्ह कंसाकरं विशेष अदालतया आदेश कथं धरौटी पुलेमफेवं जेल चालन याःगु खः । विशेष अदालतं विमान न्यायेगु प्रकरणय् कंसाकारं अनियमितता याःगु ठहर यासें ६ करोड धरौटी माग याःगु खः ।

न्यायाधीश गौरीबहादुर कार्की, ओमप्रकाश मिश्र व केदारप्रसाद चालिसेया मंकाः इजलाशं ६ करोड धरौटी माग याःगु खः । एयर बस कम्पनीयात बैना ब्यूगु धासें कंसाकार विरुद्ध अख्तियार दुरुपयोग अनुसन्धान आयोगं मुद्दा दायर याःगु खः ।

कंसाकारं लिप्पांगु इलय् तक धरौटी पुलेगु कुतः यासां सम्भव मजुइवं वय्कःयात आइतवाः सनिलय् डिल्लीबजार कारागारय् जेल चालन याःगु खः ।